Матурлығы өсөн был көндәрҙең
Кемдәр генә ҡорбан булмаған !
Исемдәрен тарих беҙгә үҙе
Һаҡлап килә алыҫ йылдарҙан.
Тыуған ил хаҡына, тыуған ер хаҡына
Ауылдаштар башын һалдылар.
Беҙҙең ғүмер өсөн улар
Мәңгегә сит илдә ҡалдылар!
30 октябрь көнө, Яңыбай ауыл мәҙәниәт йортонда, Бөйөк Еңеүҙең 80 йыллығына арналған ауыл биләмәләре араһында уҙғарылған, “Еңеү Салюты” фестивале сиктәрендә әҙерләнгән “Батыр даны мәңгелек” исемле бик матур, бай эстәлекле концерт сараһы булып үтте. Байрам бер нисә өлөштәрҙән торҙо. Беренсе өлөштә, тыуған яғыбыҙҙың яу ҡырында ятып ҡалған, яу ҡырынан еңеү менән ҡайтҡан яугирҙәребеҙ исемлеге иҫтәлегенә булдырылған обелискы алдына тантаналы венок һалыуҙан башланды. Артабан, икенсе өлөш булып, мәҙәниәт йортонда “Үлемһеҙ полк” булдырып, һуғыш яугирҙары, ветерандар, тыл хеҙмәтсәндәре портреттары тотоп, уртаҡ байрамбыҙға ҡушылыусы барлыҡ тамашасылар менән бергә район үҙәгенән килгән ҡунаҡтарҙы, баһалама ағзаларын ҡаршы алыу булһа,. өсөнсө өлөштә инде, темаға ярашлы “Бер кемдә, бер ҡасан да онотолмай” исемле күргәҙмә менән таныштырыу минуттары ойошторолдо. Күргәҙмәлә: “Һуғыш осоро техникаһы макеттары”, “Махсус хәрби операция ҡорамалдары”, “МХО -ға үрелгән маскировка селтәре”, “Хәрби дан флагтары”, “Великая победа великого народа”, “В патриотизме наше будущее России”, ” Герои нашего времени”, “Дан һеҙгә, ил батырҙары!”, “История войны в книгах, письмах войны” исемле күргәҙмәләр теҙмәһе тәҡдим ителде. Артабан байрам сараһын тантаналы асыу өсөн район хакимиәте башлығы Юланов Дәмин Марат улына һүҙ бирелде. Ә инде төп өлөшө һаналған сарабыҙҙа алып барыусыларҙың шиғыр юлдары уҡыуы менән бергә үрелеп концерт номерҙары булды.
Был кистә бик күп төрлө: еңеүгә, батырҙарыбыҙға, тыуған яҡ тураһында йырҙар йырланды, бейеүҙәр бейелде, шиғырҙар һөйләнелде.
Балалар ансамблдәре «Бөркөттәр», «Йәйғор» (Яңыбай), «Тамсылар» Ярғайыш башланғыс класс уҡыусылар ансамблдәре, «Умырзая», «Ҡороюл ынйылары», «Гөлләмә», бейеү ансамбле «Йәнгүзәл», гармунсылар ансамблдәре бер кемде лә битараф ҡалдырманы. Бигерәк тә Азамат һәм Булата Ҡыуатовтар, Фәүзиә Мортазина, Зәлиә Әлимбәтова, Фәниә Тоҡомбәтова, Рәүилә Хужахмәтова, Фуат Кужахметов, Денис Йәнсурин, Ғайса Ишмөхәмәтов, Зәлифә Тоҡомбәтова һәм Әлиә Ҡәҙербәкова тамашасыларҙың күңелдәренә хуш килде. Һәр сығыш тамашасыларҙың көслө алҡыштарына күмелеп оҙатыла барҙы. Байрам сараһы Яңыбай ауыл биләмәһе башлығы Хужахмәтов Фәһим Булат улы Ҡаҙанболаҡ ауыл биләмәһе башлығына Еңеү Салюты фестиваленең штандатты тантаналы тапшырыу менән тамамланды. Сара барлыҡ ҡатнашыусыларҙың бергәләп иҫтәлеккә фотоға төшөүе менән йомғаҡланды.
